Kooxda Barcelona oo ka socotay dalka Spain ayaa markii shanaad ku guuleysatay koobka naadiyada yurub ee Champions League-ga ee sanadka 2015-ka,ka dib markii ay 3-1 uga badisay kooxda Juventus oo ka socotay dalka talyaaniga.
Ciyaartan oo ka dhacday garoonka Olympic Stadium ee magaalada Berlin ee dalka Jarmalka ayaa waxaa garsoorayay Cuneyt Cakir oo u dhashay dalka Turkey.
Kooxda Barcelona ayaa goolka la hor martay,waxana daqiiqadii afaraad ee bilowgii ciyaarta u dhaliyay ciyaaryahan Ivan Rakitic,sidasi ayaana lagu kala nastay qeybtii hore ee ciyaarta.
Kooxda Juventus ayaa waxaa bilowgii qeybtii labaad ee ciyaarta gool bareejo ah u dhaliyay ciyaaryahan Alvaro Morata.
Ciyaaryahan Luis Suarez ayaa daqiiqadii 68-aad ee ciyaarta gool labaad u dhaliyay kooxda Barcelona.
Ciyaaryahan Xavi Hernandez ayaa bedel ku soo galay ciyaarta,isagoo saftay kulankiisii 151-aad ee koobka Champions League-ga,taasi oo ah rikoor cusub oo uu dhigay.
Kooxda Juventus oo raadineyso gool bareejo ah ayaa waxaa dhamaadkii ciyaarta quusiyay oo gool sedaxaad ka dhaliyay ciyaaryahan Neymar.
Waa koobkii sedaxaad oo ay sanadkan ku guuleysato kooxda Barcelona oo uu hogaamiyo macalin Luis Enrique,iyadoo horey ugu soo guuleysatay horyaalka dalka Spain ee La Liga iyo koobka boqortooyada ee Copa Del Rey.
Kooxda Barcelona ayaa horey koobkan Champions League-ga ugu soo guuleysatay sanadihii 1992,2006,2009 iyo 2011-kii.
Kooxda Juventus ayaa dhankeeda raadineysay in ay sanadkan ku guuleysato koobkeedii sedaxaad,iyadoo horey ugu soo guuleysatay horyaalka talyaaniga ee Serie A-da iyo koobka Coppa italia.
