Mudaneyaasha Barlamaanka Federaalka Soomaaliya oo maanta kulan ku yeeshay xarunta golaha shacabka ee magaalada Muqdisho, ayaa cod u qaadey Moshinkii laga keenay golaha wakiillada maamulka Jubaland, waxeyna go’aamiyeen in uusan jirin golahaasi.
Kulanka Barlamaanka Soomaaliya, waxaa soo xaadirtay 150, mudane waxaana shir guddoominayey guddoomiye ku xigeenka 1aad ee Barlamaanka Federaalka Soomaaliya, Mudane Jeylaani Nuur Iikar, iyadoo la xaadiriyey dhammaan xubnaha soo xaadiray kulanka.
Moshinka oo dooddiisa mar hore ay ka doodeen Barlamaanka Soomaaliya ayaa la isku raacay in cod loo qaado, waxaana u codeysay 132, mudane, waxaa diiday 6, halka 4 mudane ay ka aamuseen, iyadoo natiijada uu ku dhawaaqay guddoomiye ku xigeenka Barlamaanka Soomaaliya oo sheegay in uusan jirin golaha wakiillada Jubaland, maadaama uu waayey Kalsoonida Barlamaanka Federaalka Soomaaliya.
