Maadaama is cafintu ay tahay wax diiniyan u wanaagsan Muslimiinta isla markaana qeyb ka noqan karta is fahamka bulshada iyo wada noolashaha ayaa waxaa magaalada Galkaacyo lagu qabtay munaasabad lagu maamusayay maalinta is cafinta Soomaaliyeed oo ku beegneyd 28-ka June.
Munaasabadda oo ay ka qeyb galeen mas’uuliyiin ka tirsan dowlad gobaleedyada Puntland iyo Galmudug iyo qeybaha kala duwan ee Bulshada ayaa inteeda badan looga hadlay ahmiyadda ay leedahay haddii la helo is cafin dhab ah iyo waxa ay ka badali karto xaaladda xiligaan ka jirta dalkeena.
Dr Mahad Caabi oo ka mid ah dhallinyarada munaasabadda soo agaasimay ayaa ugu sheegay in ay rajeynayaan in is cafintu ay noqoto mid wax weyn ka badali karta wada noolashaha bulshada reer Gobolka Galgaduud.
Sidoo kale qaar ka mid ah xubnihii ka socday ururada dhallinyarada iyo haweenka Gobalka Mudug ee Puntland iyo Galmudug oo munasabadda ka hadlay ayaa tilmaamay inay diyaar u yihiin ka qeyb qaadashada barnaamijka is cafinta.
Guddoomiye ku-xigeenka Gobalka Mudug ee Puntland Xasan Wardheere Warsame ayaa sheegay in is cafintu ay tahay mid aad u wanaagsan isla markaana ay Diinteenu islaamku na fareeyso, loona baahanyahay inay is cafiyaan.
Wasiirka Wasaaradda dib-u-heshiisiinta iyo arrimaha Federaalka Galmudug Saalax Maxamed Boostaale ayaa sheegay in kan maamul ahaan ay xoojin doonaan barnaamijyada nuucaani oo kale ah.
Cabdirisaaq Max’ed Axmed
