Kulan lagu soo afmeerayay xiisado colaadeed oo in muddo ah ka taagnaa magaalooyinka Caabudwaaq, Balanballe iyo Xeraale ee gobolka Galgaduud ayaa maanta lagu qabtay deegaanka Ina Gibile ee waqooyiga gobolkaas, kaasi oo laga gaaray heshiis.
Kulanka oo ay ka qeybgaleen odayaal dhaqameed, culimaa’udiin iyo mas’uuliyiin ka kala socday degmooyinka Caabudwaaq, Balanballe iyo Xeraale ayaa waxaa uu deegaanka Ina Gibile ee gobolka Galgaduud ka socday muddo 16 cisho ah, waxaana diiradda lagu saaray sidii dadka wada dega deegaanadaasi ee ay ka dhexeeyaan deegaanka iyo daaqsinka loo heshiisiin lahaa.
Guddoomiyaha Degmada Caabudwaaq Cabdirisaaq Xasan Cowl oo la hadlay Warbaahinta Qaranka ayaa sheegay in maanta la soo gabo gabeeyay kulan in muddo ah ay yeelanayeen qeybaha kala duwan ee waxgaradka ku dhaqan Degmooyinka Balanballe, Caabudwaaq iyo Xeraale, isagoo xusay in uu aad ugu faraxsanyahay waxyaabaha lagu heshiisiiyay.
“Waxaan ku faraxsanahay in cuqaasha dhamaan ay ka qeyb galeen kulanka, isla markaana ay wada qaateen nabadda, xabad xoojin, isu soo noqosho oo lagu daweynayo dadkii wax kala tirsanayay, waxaana uu ku booriyay in la sameeyo guddi isku dhaf ah oo kormeera qodobada lagu heshiiyay, lana sameysto si wada jir ah ciidamado isku dhaf ah oo ka hortagga wax kasta oo amniga wax u dhimaya” ayuu yiri Cabdirisaaq Xasan Cowl.
