Hay’adda bisha cas ee dalka Imaaraadka Carabta ayaa maanta deeq afurin ah oo ka kooban raashin biseyl ah u qeybisay bukaanno ku jira Isbitaalka Madiina ee degmada Wadajir, halkaasi oo ay ka faa’iideysteen in ka badan 150-qoys, waxaana goobta lagu qeybinayay afurinta ay goob joog ka ahaayeen Cali Cabdul Daacad oo ah sarkaal hay’adda ay u soo wakiilatay qeybtan deeqdaan.
Ugu horeyntii waxaa goobta ka hadlay wakiilka hay’adda bisha cas ee Imaaraadka Cali Cabdul Daacad oo tilmaamay in barnaamijkan uu qeyb ka yahay macaawino ay dowladda Imaaradaka ugu talagashay inay ku caawiso dadka Soomaaliyeed ee dhibaateysan, waxa uuna hoosta ka xariiqay in ay sii wadi doonaan macaawinada nuucaan oo kale ah oo ay gaarsiin doonaan dadka tabaaleysan ee aan awoodin inay afurka iska bixiyaan.
Mudane daacad ayaa hoosta ka xariiqay in ay bisha cas imaaraadka ay kafaalad qaaday afurinta in ku dhaw 5,000 (shan kun oo qof), kuwaasi oo ku dhaqan degmooyinka gobolka, isla markaana deeq kale u qeybin doonaan waalidiinta aan carruurta xilliyada cidda dharka u iibin Karin, si loo farxad geliyo carruurta yar yar.
Qaar ka mid ah dadkii ka faa’ideystay raashinka bisil ee afurinta ah ayaa uga mahad celiyay kaalmooyinka ay mar waliba la garab taaganyihiin hay’adda bisha cas Imaaraadka Carabta dadka ku tabaaleysan degmooyinka gobolka Banaadir.
