Ciidanka Boliiska Dalka Kenya ayaa aroornimadii hore ee Saaka oo Jimca ah toogasho ku dilay Nin ka tirsanaa Ururka Al-Shabaab, kaas oo in muddo ah ay doon-doonayeen Laamaha ammaanku.
Mohamed Rashid Mwatsumiro, oo loogu yeero Msanii, ayaa lagu dilay Gurigiisa oo ku yaalla Xaafadda Ng’ombeni ee Degmada Matuga oo ka tirsan Is-maamulka Kwale, xilli ay Boliisku ku raad-joogeen.
Sarkaal ka tirsan Boliiska Kenya oo lagu Magacaabo Jeremiah Mula, ayuu howl-galkaasi kasoo gaaray dhaawac xagga Caloosha ah, kaas oo xaaladdiisa lagu baxnaaninayo Isbitaalka, sida ay laamaha ammaanku u sheegeen Jariiradda Daily Nation.
Taliyaha Boliiska is-maamulka Kwale, Tom Odero , ayaa sheegay , in Ninka la toogtay ee ka tirsanaa Al-Shabaab uu qabay dhaawac ay Ciidanku u geysteen, isla markaana ay Gurigiisa kasoo heleen Hal Baastoolad.
