Kooxahan burcad ah ayaa weerar ku soo qaaday goob ganacsi oo ay lahaayeen ganacsato Soomaaliyeed oo ku taalo magaalada Jonesburg waxaana halkaasi ay ku dileen milkiilihii goobtaas ganacsi oo lagu magacaabi jiray Nuur Xasan( Nuur Bindo) iyadoo weerarkan uu ka duwanaa weeraradii horey loogu soo qaadi jiray dadka Soomalida ah oo ku nool dalka Koonfur Afrika sida uu sheegay Cumar Jimcaale oo goob ahaa markii uu falka dilka ah uu dhacayay.
“Ragga burcad ah ayaa Dukaanka soo galay waxay qaateen alaab Dukaanka tiilay,gaarigooda ayay alaabtii saarteen waxayna rabeen in ay si bilaash ah ku qaataan ninki Dukaanka ayaa alaabtii gaariga kala soo degay waxayna ugu hanjabeen in ay dili doonaa, hanjabaada iyo dilkana wax badan um dhexeynin” ayuu yiri goobjooge Cumar Jimcaale.
Cumar ayaa intaa ku daray in goobta ay soo gaareen Ciidanka Boliiska dalkaasi iyagoo keeneen sawiro ragga la tuhunsan yahay in ay ka dambeeyeen weerarkan,waxaana sawiradaasi laga dhex aqoonsaday in burcadii ka dambeysay falka dilka ah.
Mid kamid ah ehelada Ninka la dilay ayaa sheegay in mas’uuliyiinta Safaaradda Soomaaliyeed ka codsaday in ay dabagal ku sameeyeen Kiiskan maadaama la helay cadeymo muujinaaya kooxda dhibaatada geysatay.
Jaalliyadda Soomaaliyeed oo ku nool dalka Koonfur Afrika ayaa dhibaatooyinka isugu jira dil,dhac iyo handadaad kala kulma kooxo abaabulan oo Koonfur Afrikaan ah, iyadoo tiro aad u yar oo kooxaha dhibaatadaasi geysta la soo qabto isla markaana maxkadda la soo istaajiyo.
