Kulan lagu taageerayay dhismaha golaha Wasiirada ayaa lagu qabtay magalada Cadaado ee gobolka Galgaduud kaasi oo ay isgu yimaadeen qeybaha bulshada ee halkaasi ku dhaqan, isla markaana uu soo qaban qaabiyay Maamulka Ximan iyo Xeeb.
Shirka oo ay ka qeyb galeen Xubno ka tirsan Golaha fulinta ee Maamulka Ximan iyo Xeeb iyo qeybaha bulshada degmadaasi ku dhaqan ayaa lagu taageeray golaha Wasiirada cusub ee uu dhawaan soo magacabaay Ra’iisul wasaare Cumar Cabdirashiid.
Qaar ka mid ah qeybaha bulshada oo kulanka hadal ka jeediyay ayaa kula dar daarmay Golaha Wasiirada inay xoojiyaan qorsheyaasha xukuumadda horyaalla oo ay dalka gaarsiiyaan horumar dhinacyo badan leh.
Wasiirka Arrimaha bulshada ee maamulka Ximan iyo Xeeb Cumar Maxamed Diiriye oo ka hadlay kulanka ayaa sheegay in lagu gudo jiro xilli xasaasi, loona baahanyahay in baarlamaanka uu meel mariyo gola wasiirada, si ay u dar dargeliyaan howlaha dowladda horyaalla oo ay ugu horeyso hirgelinta Nidaamka Federaalka ah iyo hiigsiga cusub ee sanadka 2016-ka.
“Waxaan mudanayaasha baarlamaanka ka codsaneynaa inay meel mariyaan xubnaha golaha Wasiirada cusub ee uu soo dhisay Ra’iisul wasaaraha Soomaaliya, si loo gaaro hiigsiga cusub ee sanadka 2016-ka iyo in guud ahaan dalka oo dhan ay ka dhacdo doorasho xor ah” ayuu yiri Cumar Maxamed Diiriye.
