Waxaa maanta lagu wadaa magaalada Jowhar inay ka dhacdo Munaasabada Caleemasaarka Madaxweynaha Hirshabeelle Maxamed Cabdi Waare, iyadoo ay ka qeyb galayaan Wafuud kala duwan oo ka kala socda Dowlada Federaalka, Dowlad Goboleedyada iyo Beesha Caalamka.
Qabanqaabada Munaasabada ayaa si weyn looga dareemayaa magaalada Jowhar, iyadoo la adkeeyay ammaanka, mas’uuliyiin ka socda Dowlada Federaalka iyo Madaxda Dowlad Goboleedyada ayaa saacadaha soo aadan lagu wadaa inay gaaraan magaaladaasi.
Mas’uuliyiinta hadda gaaray magaalada Jowhar ayaa waxaa kamid ah madaxda dowlad goboleedyada Koofur Galbeed, Puntland iyo Galmudug, iyadoo sidoo kale ay halkaas ku sugan yihiin xubno beesha caalamka ka socda.
Xildhibaano ka tirsan labada golle ee baarlamaanka jamhuuriyadda Soomaaliya, wasiiro dowladda federaalka ka tirsan iyo qeybaha bulshada ayaa sidoo kale ku qulquleya magaalada Jowhar ee xarunta dowlad goboleedka Hirshabeele.
Warbaahinta dowladda gaar ahaan Telefishinka qaranka iyo Radio Muqdisho ayaa si toos ah uga soo tabin doono xafladda caleemo saarka madaxweynaha Hirshabeele.
16-kii Bishii Septemper ee sanadkan ayuu ku guuleystay Mudane Maxamed Cabdi Waare doorashada Madaxweynaha Dowlad Goboleedka Hirshabeelle oo ka dhacday magaalada Jowhar.
