Waa Kitaabkii Alle ee uu akhrisanayay Allaha u naxariistee Nabaddoon Ibraahim Cariif oo ay shalay galab masjid ku yaalla Xaafadda Juungal ku dhex toogteen argagixisada Al-Shabaab ee ayaanka daran.
Waa kitaabkii Alle iyo Aayadihii Qur’aanka oo rasaas lala dhacay.
Labo ka mid ah kuwa ugu ayaanka daran khalqiga eebbe ayaa gudaha masjidka ugu soo galay Nabaddoon Cariif oo maalmihii tagay masjidka ugu jiray ictikaaf, isagoo maalin kasta akhrin jiray Rubuc ka mid ah Qur’aanka Kariimka ah.
Mid ka mid ah ayaa isku dayay in uu toogto marxuumka, laakiin waxaa u dhici waysay bastooladdii uu watay. Kii labaad ayaa kabihiisii la soo galay masjidka ka dibna toogtay Nabaddoon Ibraahim Cariif, isagoo sidoo kalena dhaawacay nin oday ah oo isku dayay in uu la hadlo oo uu ka waaniyo falka xun ee ay ku kacayaan.
Halkan waxay kooxda ayaanka daran ee Al-Shabaab ku geystay dambiyo oo aan kala culeys yareyn.
Waa mide waxay dishay ruux muslim ah, Soomman, waayeel ah, kana mid ah birimageydada.
Waxay dishay oo ruuxdiisa goysay isagoo ku jira beydkii Alle oo akhrinaya kalaamkii Alle.
Waa saddexe waxay toogatay oo rasaas ku dhaawacday Kitaabkii Alle.
Waxay kooxda habowsani falkan ku kacday iyadoo ay tahay bil Ramadaan weliba lagu guda jiro tobanka dambe ee bisha Ramadaan.
Intaas oo dhanna waxaa ka sii daran in ay ku faantay oo aaminsan tahay in xumaanta intaas la eg Alle loogu dhowaado.
Maalinba maalintaka dambeysa Al-Shabaab waxay ku kacayaan wax kasta oo Islaamku xarrimay, waxayna weerar ku yihiin wax kasta oo uu xitaa ku jirto Kitaabka Ilaahey.
