Kulan ka tirsan tartanka kubada cagta ee dowlad goboleedyada iyo maamulada Hiiraan, Shabeelaha Dhexe iyo Benaadir, kana socda garoonka kubadda cagta ee Benaadir ayaa waxaa galabta cayaar aad u xiiso badan ku dhexmartay cayaartooy kala mataleysay Dowlad goboleedka Puntland iyo Maamulka Gobolka Banaadir.
Cayaarta waxaa ka qeyb galay daawashadeena Wasiirka dhallinyarada iyo cayaaraha ee Xukuumadda Soomaaliya, xubno ka tirsan maamulka Gobolka Banaadir, mas’uuliyiin iyo dadweyne aad u fara badan oo ka kala yimid degmooyinka Gobolka Banaadir, kuwaasi oo wajiyadooda ay ka muuqatay farxad iyo sida ay uga soo qeyb galeen kulanka dhexd maray cayaartooyda ku cayaareysay magaca Puntland iyo kuwa Maamulka Gobolka banaaadir.
Cayaarta oo ahayd mid labada koox ay ku soo bandhigeen cayaar aad u sareyso ayaa guud ahaan waxa ay ku soo idlaatay 2-2 bar bar dhac.
Qaar ka mid ah cayaartooyda oo la hadlay Warbaahinta Qaranka ayaa sheegay inay ku faraxsanyihiin sida ay cayaarta ku soo idlaatay iyo cayaar wanaaga ay labada dhinac muujiyeen.
Wasiirka dhallinyarada iyo cayaaraha ee Xukuumadda Soomaaliya Mudane Maxamed Cabdullaahi Xasan Nuux ayaa sheegay in ujeedka tartanka loo qabtay ay tahay xoojinta iyo isdhexgalka bulshada, isagoo ciidanka amniga uga mahadceliyay sugidda nabadgelyada cayaarta.
