Ciidamada Ammaanka magaalada Boosaaso ee gobolka Bari ayaa howlgalo ammaanka lagu xaqiijinayo ka wada magaaladaasi, iyadoo howlgaladaasi lagu baadi goobayo maleeshiyaad habeen hore weerar ku qaaday saldhiga ku yaala magaalada Boosaaso waxaana ciidamada gacanta ay ku dhigeen rag looga shakisan yahay in ay lug lahaayeen weerarkaasi oo la rumeysan yahay in ay ka tirsanyihiin argagaxisada Al Shabaab.
Saraakiisha Ciidamada Boliika Maamulka Puntland ayaa sheegay in habeen hore weerarka ay soo qaadeen maleeshiyaad ka tirsan kooxda gabalkoodu uu sii dhacay Ee Al Shabaab kuwaa oo si naf la caarinima ah weerarka ugu soo qaaday saldhig ku yaala magaalada Boosaaso, waxaana ay sheegeen in baaritaano weli ay wadaan.
Dhinac kale waxaa xalay ilaa saakay ka dhacay deegaanka Buuraleyda Gal gala Dagaal u dhexeeya Maleeshiyaadka Al Shabaab iyo Ciidamada Daraawiishta ee Maamulka Puntland oo jab xoog leh u geystay maleeshiyaadkaasi welina ciidamadu ay wadaan howlgaladooda.
Ugu dambeyntii saraakiisha ciidamada ammaanka ayaa sheegay in goor dhow faah faahin ay ka siin doonaan howlgaladaasi Warbaahinta.
