Ciidamada Amniga ayaa ku guuleystay in ay soo afjaraan howgal ay ka sameeyeen Hotel Elite, waxay soo badbaadiyeen dadkii ku go’doomay Hotelka, Baaritaano ayay sameynayaan.
205 oo qof isugu jira Wasiiro, Xildhibaanno iyo dad rayid ah ayay ciidamada ka soo badbaadiyeen hotelka, waxaa kaloo ku jiray dadka la soo badbaadiyay milkiilaha Hotel Elite ee magaalada Muqdisho
Ciidamada Booliska ee sida gaarka ah u tababaran ee Haramacad oo uu hagaaminayay Taliye Farxaan Qaroole ayaa gaaray Hotelka weerarka Xagjirka Al-Shabaab kadib, waxayna bilaabeen badbaadinta dadkii ku go’doomay gudaha Hotel-ka.
Taliye Farxaan wuxuu sheegay in howlgalka ay bilaabeen kadib markii dadka laga soo saaray ayna toogteen dhammaan kooxdii argagixisada ee gudaha ka dagaalamayay.
Taliyaha wuxuu intaa ku daray in maleeshiyada weerarka fuleysay ay ahaayeen 4 nin oo mid walba ku hubeysnaa qoriga AK47.
Afarta naftood haliga ah ayaa ka dagay gaari 3RZ oo laga soo buuxiyay walxaha qarxa, kaasoo oo ay dhigeen banaanka Hotelka, markuu qarxay kadibna ay gudaha u galeen Hotelka.
Faahfaahinta Qasaaraha Dhimasho iyo dhaawac ee weerarkaasi ka dhashay waan idinla soo wadageynaa.
