Ciidamada Ammaanka Puntland ayaa maanta goob fagaare ah ku burburiyay Qamri iyo Maandooriyayaal kale, kuwaa oo lagu soo qabtay howlgallada la dagaallanka ka ganacsiga Maandooriyaha ee ka socanaya Gobalka Mudug.
Ku dhawaad labo boqol oo dhalo oo Qamri ah iyo Maandooriyayaal kale ayaa maanta Ciidamada amniga Puntand burburiyeen, waxaana madasha goob joog ka ahaa Mas’uuliyiin iyo Saraakiil ka tirsan kuwa Gobalka Mudug ee Puntland.
Taliye ku-xigeenka qaybta Booliska Gobolka Mudug ee Puntland Gaashaanle Dhexe, Cabdi Siciid Xuseen Jaamac (Koomaad) ayaa ugu horeyn ka warbixiyay howlgalka lagu soo qabtay maandooriyayaasha iyo gaarigii ay saarnaayeen oo ay la wareegeen Dowlad Gobaleedka Puntland
Guddoomiyaha Gobolka Mudug ee Puntland Faysal Sheekh Cali ayaa digniin u diray cid kasta oo ku howlan ka ganacsiga iyo isticmaalka Maandooriyaha
Xeer ilaaliyaha Gobolka Mudug ee Puntland Cabdifitaax Cismaan Aadan ayaa isna sheegay in la joogteynayo howlgallada ka dhanka ah Maandooriyaha.
