Maxamed Sahal Diiriye oo ku eedeeysan dilka Marxuum Cali Dhoore Qoorweyne oo lagu dilay 9-kii bishaan deegaanka laama ballaaar ee duleedka Koofureed ee magaalada Gaalkacyo ayaa waxa ciidanka booliiska Federaalka Soomaaliya ee ku sugan Gobalka Mudug u suurta gashay in shalay galinkii danbe ay gacanta kusoo dhigaan kaddib howlgallo lagu baadi goobayay oo ay ciidamadu wadeen tan iyo wixiii ka dambeeyay markii la dilay Allaha u naxariistee Marxuum Cali Dhoore Qoorweyne
Taliye ku-xigeenka qeybta booliiska Gobalka Mudug ee Galmudug Gaashaanle Dhaxe Maxamuud Cilmi Gulaafe ayaa Warbaahinta Qaranka uga warbixiyay maanta howlgalka lagu soo qabtay eedeeysane Maxamed Sahal Diiriye, waxaana uu sheegay in tan iyo wixii ka dambeeyay markii la dilay Marxuum Cali ay ciidamada booliiska Galmudug wadeen baadi goob ku aadan sidii gacanta loogu soo dhigi lahaa cidii ka danbeysay falkaasi dilka ah, kadibna shalay galinkii dambe ay u suurta gashay in ay gacanta kusoo dhigaan eedeeysane Maxamed Sahal Diiriye dhawaana Maxkamad lasoo taagi doono.
Gaashaanle dhaxe Maxamuud Cilmi Gulaafe ayaa shegay in xaaladda Amniga GOBALKA mudug xiligaan ay tahay mid hagaagsan, waxaana uu tilmaamay in ciidamada Xoogga Dalka Soomaaliyeed ee ku sugan Gaalkacyo ay kaalin fiican ka qaateen howlaha sugidda Amniga Gobalka Mudug ayna uga mahad celinayaan doorka lama iloobaanka ah ee ay ka qaateen xasiloonida iyo deganaanshiyaha amni ee ka muuqda magaalada Gaalkacyo ee guud ahaan Gobalka Mudug
Waxaa Diyaariyay Wariye C/risaaq Maxamed Axmed (Galkacyo)
