Howlgal ay ciidamada Booliisku maanta ka sameeyeen xaafad ka mid ah degmada yaaqshiid ayaa lagu soo qabqabtay hub iyo maleeshiyaad ka tirsan kooxda UGUS.
Howlgalkan oo ahaa mid ay ciidamadu ku bartilmaameedsanayeen guri ku yaala xaafad ka mid ah degmada Yaaqshiid oo lagu diyaarin jiray qaraxyada lagu dhibaateeyo shacabka Soomaaliyeed ayeey ciidamadu ku guueeysteen iney gacanta ku dhigaan hub, walxaha qarxa iyo dhagar qabayaal ka tirsan kooxda UGUS ee Alshabaab oo gurigaasi ku sugnaa.
Ciidamada oo waaberigii saaka howlgalka billaabay ayaa sidoo kale waxey gacanta ku soodhigeen haweeneey iyo laba nin oo ku sugnaa gurigaasi kuwaasoo la rumeysanyahay iney ka tirsanyihiin maleeshiyaadka Shabaab.
Taliye ku xigeenka ciidanka booliiska Soomaaliyeed Jeneraal Muqtaar Xasan Afrax ayaa Radio Muqdisho u sheegay in xog ay ka heleen dadka deegaanka ay u suurtagelisay ineey ciidamadu galaan guri ay maleeshiyaadka Shabaab ku diyaarin jireen walxaha qarxa iyo dhagar qabayaal ka tirsan Shabaab.
“Howlgal ayaa ciidamadu waxa ay fuliyeen degmada Yaaqshiid waana arrin la dabasocday muddo sirdoonka booliiska iyo saldhigga Yaaqshiid howl ay wada sameeynayeen ayeey ahyeed, waxaa la helay warbixino ah in cadowgu ay maleegayaan shirqoollo, xalay saqdii dhexe ayeey ciidammadu howlgal ka sameeyeen goobtaasi waxaana laga qabtay walxaha qarxa iyo qalabkii laga sameeyn jiray qaraxyada, miinooyinkii bistooladihii dadka shacabka ah ay ku dilijireen dadkii guriga loogu yimid guriga waxaa la geeyay hoggaanka barista booliiska” ayuu yiri Jeneraal Muqtaar Xasan Afrax taliye ku xigeenka ciidanka booliiska.
Howlgalkan ay ciidamadu ka sameeyeen degmada Yaaqshiid ayaa qeyb ka ah qorshayaasha lagu xaqiijinayo amniga caasimadda dalka ee Muqdisho.
