Ciidamada XDS iyo kuwa AMISOM ayaa howlgallo ay ka sameeyeen deegaano ka tirsan gobolka Galgaduud ku soo qabtay maleeshiyaad ka tirsan Shabaab “UGUS”.
Cutubyo ka tirsan ciidamada XDS gaar ahaan qeybta 21-aad ee ka howlgala gobollada dhexe ee dalka oo gacan ka helaya kuwa AMISOM ayaa howlgallo ay ka sameeyeen degeenka Ceel qooxle oo 25 Kiilo mitir dhanka waqooyi ka xiga degmada Ceelbuur waxa ay ku soo qabqabteen Sadex ka tirsanaa maleeshiyaadka UGUS ee dhibaatada ku haya bulshada ku dhaqan deegaankaasi.
Sidoo kale ciidamada ayaa howlgalkaasi kula wareegay deegaanka Ceel qooxle iyo deegaanno kale, waxaana la sheegay in ciidamadu ay iminka ku sii raad joogaan firxadka maleeshiyaadka UGUS, sida uu ku soo waramay wariyaha Radio Muqdisho uga soo warama gobolka Galgaduud Maxamed Deeq Cabdi Maxamed.
Howlgalka ay ciidamadu ka sameeyeen deegaanka Ceel qooxle ayaa lagu soo waramayaa iney ku geeriyoodeen ku dhawaad Shan ka tirsanaa maleeshiyaadka nabad diidka ah ee UGUS.
Ciidamada ayaa weli sii wada howlgallada ka dhanka ah haraadiga maleeshiyaadka Shabaab ee ku dhuumaaleysanaya deegaanno ka tirsan gobolka Galgaduud.
