Ciidamada Xoogga Dalka ayaa jab xoogan u geystay maleeshiyaad ka tirsan Al-Shabaab oo weerar ku soo qaaday fariin ciidamadu ay leeyihiin.
Guddoomiyaha deegaanka nambar 50 Cabdullaahi Cali Axmed Waafow ayaa sheegay in dagaalka ay uga dileen Al-Shabaab labo ka tirsan maleeshiyaadkooda, kuwaasi oo ay iminka gacanta ku hayaan meydadka labada qof ee laga dilay.
Guddoomiyaha oo la hadlay Radio Muqdisho ayaa sheegay in dagaalka uu socday in ka badan 48 saacadood, kaasi oo ka dhashay markii Shabaabku ay weerareen tuulooyin hoostaga deegaanka Nambar 50, halkaasi oo ay ku laayeen dad maato ah iyo xoolihii ay lahaayeen.
“Xalay, shalay ilaa iyo habeen hore waxaa ka jiray halkan dagal culus oo ka dhacay deegaanka Nambar 50, kadib markii maleeshiyada Al-Shabaab ay weerar ku soo qaadeen xarun ciidamada xoogga ay ku leeyihiin deegaanka iyo tuulo ay dad rayid ah ku noolyihiin, waxaana halkaasi lagu dilay labo ka tirsan maleeshiyaadka Al-Shabaab.
Guddoomiyaha ayaa xusay in dagaalku uu ka bilowday weerar ay Shabaabku ku soo qaadeen tuulo 8 km u jirta deegaanka Nambar 50, halkasi oo ay ku gubeen guryo, kuna laayeen carruur iyo dad kale oo maato ah.
Ciidamada xoogga dalka ayaa ku baxay goobta ay Shabaabku weerarka ku soo qaadeen, halkaasi oo ay ciidamada ka saareen, waxaana xalay maleeshiyaadka Shabaabku ay weerar ku soo qaadeen fariisin ciidamada xoogga dalka ay leeyihiin, kadibna jab xoogan loogu geystay.
