Howlgallo qorsheysan iyo duqeymo is barbar socday oo ay si wadajir ah u fuliyeen ciidamada sida gaarka u tababaran ee DANAB iyo kuwa Mareykanka, ayaa ka fuliyay deegaanno hoos yimaada gobolka Jubbada Hoose ee koonfurta dalka Soomaaliya.
Taliyaha ururka shanaad ee ciidamada Danab, Gaashaanle Xasan Maxamed Aadan (Ciraaqi) oo lahadlay Idaacadda Codka Ciidamada Qalabka Sida ayaa faah faahin ka bixiyey weerarada lala beegsaday kooxaha nabaddiidka argagixisada Al-Shabaab ee dhibaatada ku haya shacabka Soomaaliyeed, oo ay ka burburiyeen ilaa seddex saldhig oo ay ku sugnaayeen xubno ka tirsan maleeshiyada kooxdaas.
Taliyaha ayaa tilmaamay in saldhigga koowaad ee cagta la mariyay uu ahaa mid ku yaala tuulada Buulo Xaaji, halka kan labada ay argagxisada Al-Shabaab ku lahayeen tuulada lagta Caanoole oo ka tirsan gobolka Jubbada Hoose.
Gaashaanle Xasan Maxamed Aadan (Ciraaqi) ayaa intaasi ku daray inay gabi ahaan la wareegeen saldhigyadaasi, isla markaana ay haatan ka wadaan baaritaanno dheeraad ah si ay uga bixiyaan miinooyinka ay maleeshiyadu ku aaseen.
Taliyaha ayaa sidoo kale sheegay in howlgalka duqeynta lagu burburiyey labo gaari oo kala ahaa Toyoto Succeed iyo Suzuki oo uu tilmaamay in ay la socdeen horjoogayaal sar sare oo ka tirsanaa kooxda nabadiidka ah Al-Shabaab, islamarkaana ay ku jireen kuwa ajaaniib ah.
Ciidamada Xoogga dalka Soomaliyeed ayaa maalmihii ugu dambeeyey xoojiyey dhaq dhaqaaqyada milatari ee ay ka wadaan gobollada Jubbooyinka iyo Shabeelada Hoose, si looga xoreeyo qowleysatada cadowga ummadda Soomaaliyeed ee halkaasi ku dhibaateynaya shacabka.
Halkan ka dhageyso Wareysiga taliyaha
