Gudoomiyaha magaalada Dhuusamareeb ahna Duqa Caasimada Galmudug oo ay wehliyaan saraakiisha Ciidamada Booliska Iyo Nabadsugida ee heer Degmo iyo Xubno ka tirsan Maamulka Degmada ayaa kormeerkii ugu horeeyey ee Maamulka cusub ku gaaro meel ka baxsan magaalada Dhusamareb oo ay ku tageen Deegaanka Ceel-dheere oo ka mid ah Deegaanada hoostaga Dhuusamareeb .
Kormeerkan ayaa la xiriira sidii loo hagaajin lahaa Maamulka Deegaankaasi, iyadoo wadatashi mug leh lala sameynayo waxgaradka iyo qaybaha kala duwan ee bulshada .
Xubnaha Maamulka waxaa deegaanka Ceel-dheere ku soo dhoweeyay Gudoomiyaha Deegaanka, Odayaasha dhaqanka iyo qaybaha kala duwan ee bulshada oo kaga xog waramay guud ahaan culeesyada wax ka qabashada u baahan, waxaana goobtaasi ugu horeyn ka hadley Gudoomiyaha Ceel-dheere Cabdullaahi Cabdiraxmaan Raage iyo qaar ka mid ah Odayaasha Dhaqanka .
Dhamme Burhaan Axmed Rooble Taliyaha Booliska Dhuusamareeb oo isna goobta ka hadley ayaa bulshada deegaanka u diray fariin Amniga la xiriirta, isagoo ka dalbadey shacabku in ay la shaqeeyaan laamaha Amaanka .
Cabdicasiis Aadan Afrax Xoghayaha Maamulka Dhuusamareeb iyo Gudoomiyaha Caasimada Galmudug Macalin Cabdiraxmaan Cali Maxamed Geeda-qorow oo ugu dambeyn la hadley bulshada Deegaanka Ceel-dheere ayaa waxay u balan qaadeen inay ka shaqayn doonaan horumarka deegaanka.
