Ciidanka Dowlad Goboleedka Jubbaland iyo kuwa Xoogga Dalka ayaa howlgallo qorsheysan ka fuliyay deegaanno hoos yimaada Degmada Jamaame ee Gobolka Jubbada Hoose.
Howl-galladan oo ahaa kuwa Qorsheysan ayaa waxay ka dhaceen meel 10 KM u jirta degmada Jamaame, iyagoo ciidanka Xoogga Dalka iyo kuwa Jubbaland oo is garabsanaya ay jiinka wabiga ka galeen deegaanka Yiirey oo aan sidaa uga fogeyn degmada Jamaame.
Tira ka mid ah Maleeshiyaadka Argagixisada Al-Shabaab ayaa howlgalka lagu khaarajiyay, waxaana nolasha lagu hayaa oo maxaabiis ahaan loo soo qabtay tira iyaga ka mid ah.
Sida ay sheegeen Sarakisha Ciidamada Jubbaland 5 Qof oo saddex ka mid ah ay ahaayeen horjoogayaal sar sare ayaa lagu diley howlgalka.
Horjoogayaasha Shabaab ee la qabtay ayaa lagu kala magacaabaa Cali Waraabe, Tima Jilic iyo Galley kuwaas oo Maleeshiyaadka u qaabilsanaa dhibaateynta dadka deegaanka.
Argagixisada Al-Shabaab ayaa la gaarsiiyay khasaaro xooggan, iyagooo degmada Jamaame ka soo direy 3 Gaari iyo ciidankooda balse Ciidmada Mareykanka oo howl galka qayb ka ahaa ayaa gabi ahaanba duqeeyay 3-dii Gaari iyo dhammaan ciidankii saarna, halkaas waxaa ku basbeelay tiro xoog leh oo ka mid ah Argagixisada Al-Shabaab.
Weli waxaa ka socda deegaannada hoos yimaada Degmada Jamaame gaar ahaan kuwa saaran jiinka Webiga howl-gallada lagu baacsanayo haraadiga Al-Shabaab, iyagoo ay ciidamada xoogga dalka iyo kuwa Jubbaland ay kaabiga ku hayaan degmada Jamaame.
