Wasiirka amniga gudaha iyo taliyaha ciidanka Booliiska Soomaaliyeed ayaa dalka Jabuuti tababar ugu soo xiray ciidamo ka tirsan Booliiska Soomaaliyeed.
Tababarkan Jabuuti loogu soo xiray cutubyo ka tirsan ciidanka Booliiska Soomaaliyeed oo socday muddo Sadex Bilood ah ayaa lagu baranayay ilaalinta madaxda dowladda ka hortagga dibadbaxyada,ย sida loo baaro meydadka la garan waayo cidda dilkooda ka dambeyso iyo sida askarigu nafsaddiisa u badbaadiyo.
Ciidamadan booliiska ah ayaa dhoolatus iyo gaadda ka ciyaar ku soo bandhigay dugsigii tababarka ay ku qaateen oo ku yaala dalka Jabuuti.
Munaasabaddi tababarka loogu soo xirayay ciidamadaasi ayaa waxaa ka hadlay taliyaha ciidanka Booliiska Jabuuti Col. Cabdullaahi Cabdi Faarax oo sheegay in uu aad ugu faraxsanyahay in uu arko ciidamo Soomaali ah oo tababar ย ku qaatay dalka Jabuuti.
Taliyaha ciidanka Booliiska Soomaaliyeed Jeneraal Maxamed Sheekh Xasan Xaamud oo isna ka hadlay munaasabaddaasi ayaa ciidanka ku baraarujiyay in sababta loo soo tababaray ay tahay iney ka hortagaan falalka amnidarrada ah ee dalkeenna ka jira, isagoo kula dardaarmay iney la yimaadaan dulqaad badan iyo karti dheeraad ah.
Wasiirka Amniga gudaha mudane C/risaaq Cumar Maxamed oo munaasabadda ka hadlay ayaa uga mahadceliyay dowladaha Talyaaniga iyo Jabuuti tababarkan ay siiyeen ciidamadan ka tirsan Booliiska Soomaaliyeed.
โCiidanku waa inuu leeyahay akhlaaq, ciidanku waa inuu yahay saaxiibka shacabka gaar ahaan booliiska marka laga hadlayo, waa ciidankii laga sugayay iney sugaan amniga waxaan idinkula dar daarmayaa inaad noqotaan ciidan ay shacabku ku hirtaanโ Ayu yiri wasiirka amniga gudaha oo la hadlay ciidamada tababarka loogu soo xiray dalka Jabuuti.
