Ciidamada Hay’adda Nabad sugidda ee Gurmadka Gor gor ayaa maanta kulan afurin ah u sameeyay qaar ka mid ah qoysaska danyarta ah ee degan Carwadii hore ee degmada Hodan, iyadoo afurinta ay bar bar socotay baaritaanno ay ciidamadu ku sameynayeen gaadiidka iyo dadweynaha isticmaalayay wadooyinka ee xaafadaha degmada Hodan.
Ciidamada ayaa ku booqanayay dadka guryahadooda, iyadoo markii ay baaritaannada u soo gabo gabowday ay dadka danyarta ah siinayeen afurin ay ugu talagaleen inay qoysaskaasi ku afuraan, taasi oo ka dhigan sida ay ciidamada amniga uga go’antahay in ay gacan qabtaan shacabka tabaaleysan, ayna ka hortagaan cidkasta oo dhibaato u keeneysa shacabka.
Afhayeenka Wasaaradda Amniga Gudaha Maxamed Yuusuf Cismaan oo lahadlay Warbaahinta Qaranka ayaa sheegay in ciidanka hay’adda NISA ay howlgallo baaritaano ay ka sameeyeen qaar ka mid ah xaafadaha degmada Hodan, isagoo intaa ku daray in ciidanku ay afurin u sameeyeen qaar ka mid ah qoysaska ku nool degmada Hodan.
“Ciidanka NISA, waxa ay baaritaanno amni xaqiijin ah iyo gurmad ay u fidinayeen qoysas danyar ah u sameeyeen afurin, runtii ciidanka Nabad sugidda gaar ahaan gurmadka Gor gor, waxa ay mid u galeen xaafadaha, iyagoo si naxariis leh ugu gurmaday, qoysaska aan haysanin afurinta, u jeedka arrintan ayaa ah in laga hortago dhacdadii maanta ay argagixisada ku doonayeen inay shacabka ku gumaadaan, Ciidanka NISA, waxa ay joogteeynayaan u gurmashada shacabka iyo ka hortagga falalka amniga lidiga ah ku ah” ayuu yiri Afhayeenka Wasaaradda Amniga gudaha.
Afhayeenka ayaa ugu baaqay shacabka inay xoojiyaan la shaqeynta ciidanka, si oo xaqiijiyo guud ahaan amniga dalka, gaar ahaan tan caasimadda, isla markaana ay ciidanka Nabad sugidda ee Gurmadka Gor gor sii wadi doonaan howlgallada looga hortagayo amni darrada iyo u gurmashada dadka tabaaleysan inta lagu guda jiro bishan barakeysan ee Ramadaan.
