Siminaar ku saabsan sidii ay u wada shaqeyn lahaayeen ciidanka Nabadgelyada Waddooyinka, Wasaaradda Gaadiidka, Iskaashatooyinka Gaadiidleeyda iyo shirkadda Ceymiska Islaamiga ee Soomaaliya ayaa maanta ka furmay xarunta Qaybta Nabadgelyada Waddooyinka ee Muqdisho.
Furitaankii siminaarka waxaa ka qeyb galay xubno ka tirsan maamulka Gobolka Benaadir, Nabadgelyada Waddooyinka iyo xubno kale, waxaana u jeedkiisu yahay in wada shaqeyn dhexmarto Wasaaradda Gaadiidka, Iskaashatooyinka Gaadiidleeyda, shirkadda Ceymiska Islaamiga ee Soomaaliya iyo ciidanka Nabadgelyada Waddooyinka.
Guddoomiyaha shirkadda Ceymiska Islaamiga Soomaliya Maxmad Cabdi ayaa sheegay in tababarkan uu wax badan ka badali doonto howlaha wada shaqeyn ee ka dhexeysay qeybahaasi, isagoo intaa ku daray in dhankooda ay diyaar u yihiin la shaqeynta ciidanka Nabadgelyada Waddooyinka ee Taraafiko.
Guddoomiye ku-xigeenka dhanka Siyaasadda ee Gobolka Benaadir Maxamed Aadan Guuleed “Caano-geel” oo isna ka hadlay furitaanka tababarka ayaa sheegay in ka maamul ahaan ay soo dhaweynayaan tababarkan, isla markaana uu ka codsanayo ka qeyb galayaasha inay ka faa’iideystaan fursadaan, ayna isla meel dhigaan sida ugu fudud ee ay ku wada shaqeyn karaan.
Taliyaha Qeybta Nabadgelyada Waddooyinka Sareeyo Guuto Cali Xirsi Barre “Cali gaab” oo furay siminaarka ayaa sheegay in siminaarkan uu socon doono muddo saddex cisho ah, isla markaana loo qabtay qaar ka mid ah ciidanka ilaalada Nabadgelyada Waddooyinka iyo Iskaashatooyinka Gobolka, isagoo ugu baaqay in ay waqtiga ilaaliyaan, ayna ka faa’iideystaan muddada uu tababarka socdo.
Sawir Qaade:- Farxaan Suleymaan Daahir
