Ciidanka Hay’ada Nabad Sugidda iyo Sirdoonka Qaranka ee NISA ayaa fashiliyay gaari ay saaranyihiin walxaha Qarxa kaas oo ay ku raadjoogeen ciidamada ammaanka.
Gaarigaan ayaa la sheegay inuu qarxay markii ay isku hareeyeen ciidanka NISA xili uu marayay meel u dhaw Isgoyska Ex-koontarool Afgooye.
Gaarigan ayaa ahaa mid ay wateen maleeshiyaad ka tirsan Al-Shabaab, waxaana saaka goor hore ay rasaas ku fureen gaari uu lahaa sargaal ka tirsan Wasaaradda Maaliyadda oo aan gaariga xilligaasi saarneyn, intaas kadib ayay ciidanka booliska ka warhaleen oo ay ku baxeen goobta uu shilka ka dhacay, taasi oo ay is weydaarsadeen iyaga iyo ciidanka booliska rasaas waxaana goobta ku dhitan hal askari.
Ciidamada amniga oo ku raadjoogay gaarigan, isla markaana ka duulayay xogaha ay ka heleen shacabka Soomaaliyeed ayaa amar ku bixiyay in ciidamada amniga oo dhan la geliyo heegan, waxaana markii dambe maleeshiyaadkii watay gaarigan ay uga carareen meel u dhaw Ex-koontarool Afgooye, markii ay wax gurmad ah ka waayeen shacabkii halkaasi deganaa.
Ciidanka Hay’adda NISA ayaa goobta uga daba tegay gaariga oo aan cidna saarneyn, waxaana markii ay isu gadaameen gaariga ay ogaadeen in uu sido qaraxyo, kaasi oo markii dambe qarxay, waxaana wararku ay sheegayaan in Qaraxaasi ay ku dhaawacmeen ilaa iyo Afar Askari.
Saraakiisha NISA ayaanan wali wax faah faahin ah ka bixin arrintaan.
