Ciidamada xooga dalka iyo kuwa maamulka jubbaland ayaa goordhaw la wareegay deeganada Juungal iyo Jali Xareed oo qiyaastii 40km u jirta degmada Baardheere ee gobolka Gedo.
Mas’uuliyiin ka tirsan maamulka gobolka Gedo ee koofur galbeed Soomaaliya ayaa xaqiijiyay in ciidanka xooga dalka ay hadda gacanta ku hayaan deegaanada ay kala wareegeen maleeshiyaadka Al-shabaab.
Deeganada ay la wareegeen ciidamada xooga dalka iyo kuwa maamulka Jubbaland ayaa horay waxaa ugu sugnaa kooxda maleeshiyaadka Al-shabaab kuwaas oo dhibaatooyin badan ku hayay shacabka ku dhaqan deegaanadaasi.
Maamulka Jubbaland ayaa horay wacad ugu maray in ay ka sifeyn doonaan deegaanadooda maleeshiyada Al-shabaab ayagoo kaashanaya ciidamada xooga dalka Soomaaliya.
Mudooyinkan dambe ayaa ciidanka xooga dalka Soomaaliyeed gaar ahaan kuwa kamandooska waxaa ay fulinayeen howlgalo lagu bartilmaameedsanayo horjoogiyaasha iyo maleeshiyaadka Al-shabaab, iyadoo weerarkii u dambeeyay lagu qaaday deegaanka Beerxaano oo ka tirsan gobolka Jubada hoose halkaas oo lagu diley horjoogiyaal Al-shabaab ahaa.
