Cutubyo ka tirsan ciidanka XDS o wata gaadiidka dagaalka ayaa si buuxda ula wareegay deegaanka Wabxo oo ka tirsan degmada Ceelbuur, kaddib howlgallo ay halkaasi ka sameeyeen.
Col. Axmed Maxamed oo ka mid ah saraakiisha hoggaamineysa howlgalka lagula wareegay deegaanka Wabxo ayaa sheegay iney si nabadgelyo ah oo dagaal la’aan ah, kula wareegeen tuulada Waxbo, isagoo intaa ka daray iney ku sii wajahanyihiin deegaano ka tirsan degmooyinka Galcad iyo Ceeldheer ee gobolka Galgaduud.
“Ciidamada waxay dagaal la’aan kula wareegeen Wabxo iyo deegaanada ku dhow dhow oo awal ay dhuumaaleysi ku imaan jireen Shabaab, waxaana qorshaheenu yahay inaan gaarno deegaannada kale ee dhaca bariga Galgaduud” ayuu yiri Col, Axmed Maxamed.
Howlgalkan ay ciidamadu kula wareegeen deegaanka Wabxo ayaa qeyb ka ah dadaallada ay dowladdu ugu jirto sidii dalka oo dhan looga sifeeyn lahaa haraadiga maleeshiyaadka Shabaab ee dhibaatada daran ku haya ummadda Soomaaliyeed.
