Ciidanka Kummaandooska Soomaaliya ayaa Maleeshiyaadka Al-shabaab kala wareegay Degmada Aw-dheegle ee gobalka Shabeellaha Hoose iyo deegaano muhiim ah oo ay Al-shabaab Saldhigyo ku lahaayeen.
Ciidamada Kummaandooska ayaa Galabta howlgal qorsheysan ka billaabay deegaanka Bariire oo hoosyimaada degmada Afgooye ee Gobalka Shabeellaha Hoose.
Xasan Cabdulqaadir Abuukar oo hoggaaminayay howlgalka Kummaandooska Soomaaliya, ayaa Wakaaladda Wararka Somaaliyeed Ee SONNA u sheegay in howlgalku uu billaawday Galabta, ayna al-shabaab kala wareegeen Degmada Aw-dheegle, tooliyinka Bariire, Mubaarak iyo deegaano kale oo Istiraatiiji ah.
“Galabta Toban Saac ayuu howlgalku billoowday, waxaan la wareegnay Saldhigyo muhiim ah oo maleeshiyaadka Al-shabaab ku lahaayeen, laga soo billaabo Bariire illaa Aw-dheegle, mana jirin wax iska caabin ah oo Ciidamadu ay kala kulmeen maleeshiyaadka kooxda Al-shabaab”. ayuu Yir Xasan Cabdulqadir.
Taliyaha Horkacay Ciidamada Kummaandooska ee howlgalka wada, oo aan wax ka weydiinay haddii uu jiro qasaare Ka dhashay howlagalka, ayaa tilmaamay in habayaraatee aanu jirin wax soo kala gaaray Ciidamada iyo Maleeshiyaadka al shabaab, maadaama aysan jirin wax iska caabin ah oo ay kala kulmeen kooxahaasi.
Xasan, ayaa intaa ku daray in howlaglku uu yahay mid qorsheysn, kooxda alshabaabna ay kala wareegayaan deegaanada ay kaga suganyihiin gobalka.
Wariyeyaal ka tirsan Warbaahinta qaranka ayaa kusoo waramaya in wali howlgalku socdo, islamarkaana muuqaallo iyo sawirro ka tarjumaya deegaanada ay ciidamadu la wareegeen ay bulshada Soomaaliyeed u soo bandhigi doonaan.
