Ciidanka Xoogga Dalka Soomaaliyeed iyo kuwa midowga Africa ee AMISOM ayaa Gudaha u galay goor dhow oo si rasmi ah ula wareegay Degmada Diinsoor ee Gobolka Bay, halkaasi oo Laga ceyriyay Maleeshiyaadka argagaxisada Al Shabaab.
Argagaxisada Al-shabaab ayaa isaga baxay degmada Diinsoor, iyadoo ciidanka ay xalay ku hoydeen duleedka degmadaasi, iyagoo ku kallahay saakay aroortii hore, iyagoo aan la kulmin wax iska cabin ah oo kaga timid UGUS.
Sarkaal u hadlay ciidamada dowladda Somalia oo la hadlay Warbaahinta isagoo ku sugan degmada Diinsoor ayaa xaqiijiyay in ciidamada dowladda ay galeen saaka degmadaas oo ka mid ahayd degmooyinkii ay Al-shabaab ka talinaysay.
Abaanduulaha Qeybta 60-aad ee Ciidanka Xoogga Dalka Soomaaliyeed Korneel Ismaaciil Khaliif Axmed oo goor dhow la hadlay Radio Muqdisho ayaa sheegay in si nabdoon ay ula wareegeen Degmada Diinsoor ayna si wanaagsan u soo dhaweeyeen dadka deegaanka oo ku faraxsan ka dulqaaditaanka laga dulqaaday cadowga Al Shabaab.
Magaaladan ayaa noqonaysa magaaladii labaad oo ay ciidamada dowladda FS iyo kuwa AMISOM kala wareegaan Al-shabaab Muddo 48-saacadood gudahood ah, kaddib markii maalin ka hor ay la wareegeen degmada Baardheere ee Gobolka Gedo, waxaana guuldarooyinkani Argagaxisada soo wajahaya ay ka dhigantahay baaba’a kooxda oo heer gaba gaba ah maraya.
