Banaanbax loogu baroordiiqayay dadkii ku dhintay qarixii ka dhacay Muqdisho gaar ahaan Isgoyska Soobe ee bartamaha Muqdisho ayaa maanta ka dhacay magaalada Buuhoodle, kaasi oo ay ka qayb qaateen shacabka Buuhoodle, Cuqasha iyo qaybaha bulshada ee ku nool Bouhoodle.
Dadkii isu soo baxa ka qeyb galay ayaa watay boorar ay ku qornaayeen hal ku dhigyo looga soo horjeeday maleeshiyaadka Al-Shabaab, waxaana intii ka qeybgashay ay sheegeen inay ka xunyihiin falkii wuxuushnimada Al-Shabaab ay ka geysteen Muqdisho.
Sidoo kale culimaa’udiinkii iyo qeybaha kale ee ka qeyb galay waxa ay si wada jir ah ugu baaqeen shacabka Soomaaliyeed iyo Madaxda dowladda Federaalka ah ee Soomaaliya inay hal meel uga soo wada jeestaan argagixisada Al-Shabaab.
Dhamaan dadkii isugu soo baxay magaalada Buuhoodle ayaa Alle uga baryay intii ku dhimatay weerarkii 14-kii bishan ka dhacay magaalada Muqdisho oo ay Shabaab ku xasuuqeen shacab aan waxba galabsan.
Maxamed Cali Bile Buuhoodle
