Munaasabad ay soo qaban qabisay Jimciyadda SOHEDA islamarkaana looga soo horjeeday inqilaabkii fashilmay ee ka dhacay dalka Turkiga ayaa lagu qabtay xarunta Jimciyaddaasi ee magaalada Muqdisho.
Kulankaasi waxaa ka qeybgalay xildhibaanno ka tirsan baarlamanka Federaalka Soomaaliya, dadweyne farabadan iyo mas’uuliyiinta hey’adda SOHEDA, iyadoo halkaasi si kulul loogu cambaareeyay isku daygii fashilmay ee la doonayay in meesha looga saaro xukuumadda dimuquraadiga ku dhisan ee madaxweyne Rajep Dajib Erdugan.
Xildhibaan Yuusuf Xeyle Jimcaale, Xildhaan Maxamed “Sey Sey” iyo xildhibaan Khadiijo Maxamed Diiriyo oo kulankaasi ka hadlay ayaa si isku mid u cambaareeyay inqilaabka fashilmay oo qaar ka mid ah ciidamada Turkigu ay sameeyeen, waxeyna tilmaameen in ummadda Soomaaliyeed ay garab taagantahay shacabka iyo dowladda Turkiga.
Mas’uuliyiintaasi ayaa ka sheekeeyay xiriirka qotada dheer ee u ย dhaxeeyay labada dal, waxeyna xuseen gurmadkii ay walaalaha Turkiga u fidiyeen shacabka iyo dowladda Soomaaliyeed, iyagoo muujiyay taageerada ay u hayaan madaxweyne Erdugan, islamarkaana cod dheer ku cambaareeyay inqilaabkii fashilmay ee ka dhacay dalka Turkiga.
