Marwada madaxweynaha Qamar Cali Cumar oo ay wehlisay guddoomiyaha ururka haweenka Qaranka Soomaaliyeed Batuulo Sheekh Axmed Gabballe iyo mas’uuliyiin kale ayaa maanta booqatay xarunta xanaanada agoonta Boondheere halkaasoo ay ku sugnaayeen caruurta agoonta gabdhaha ee Boondheere iyo agoon wiilal ah oo ka yimid xarunta xanaanada agoonta wiilasha Rajo oo ku taala degmada Yaaqshiid.
Maamulaha labada xarumood ee “Boondheere iyo Rajo” Marwo Nuurto Maxamed Caddoow ayaa si siirran u soo dhaweey marwada madaxweynaha Qamar Cali Cumar iyo mas’uuliyiinta kale ee la socotay.
Gudoomiyaha degmada Boondheere oo ka hadlay munaasabadda loo sameeyay caruurtaasi agoonta ah ayaa si weyn u soo dhaweeyay in marwada madaxweynaha ay maanta la ciiddo caruurta agoonta ah, wuxuuna dhinaca kale ammaan iyo bogaadin u soo jeediyay maamulaha labada xarumood ee Boondheere iyo Rajo marwo Nuurto Maxamed Caddoow oo uu sheegay iney xil weyn iska saartay daryeelka caruurta agoonta ah.
Marwada Madaxweynaha Qamar Cali Cumar oo munaasabadaasi ka hadashay ayaa muujisay sida ay ugu damqaneyso caruurta Soomaaliyeed ee agoonta ah, waxeyna ka hadashay ahmiyadda ay leedahay daryeelka caruurta agoonta ah, iyadoo dhex fariisatay caruurta yar yar halka qaar ka mid ahna ay dhabta saartay.
Sawir-qaade Mowliid Maxamed Sabriye
