Shacabka dalka Turkiga ayaa ka dhiidhiyay isku daygii afgambi oo qaar ka mid ah ciidamada dalkaasi ay sameeyeen iyagoo isugu soo baxay wadooyinka magaalooyinka Ankara iyo Istanbuul, kuwaa oo muujinayay in ay taageersan ihiin Madaxweynaha Ergugan.
Shacabka oo wata calanka Turkiga ayaa bilaabay in ay dusha sare ka fuulaan Taangiyada ay wataan Ciidamada Milatariga ee doonayay in ay afgambi sameeyaan, waxa ayna sidoo kale dadka qaarkood isku dhigeen oo hor jiifteen Taangiyada ay wateen ciidamada sameeyay afgambiga dhicisoobay.
Waxaa la arkayay Taageerayasaha Madaxweynaha oo baabuurtooda ku xiray Wadooyinka qaar si aysan halkaasi usoo gaarin taangiyada, waxaana wali banaanbaxyo looga soo horjeedo falka ay ciidamadu ku kaceen uu ka socdaa Wadooyinka Ankara iyo Istanbuul.
Sidoo kale waxaa weli socda howlgallo lagu soo xirxirayo dhamaan ciidamadii ka qeybqaatay afgambigaasi dhicisoobay, iyadoo shacabka Turkigu ay muujiyeen sida ay uga soo horjeedaan in la afgambiyo dowladda madaxweyne Erdugan ee ku dhisan dimuquraadiyadda.
