Hoteelka Saxafi oo ay saaka weerar argagixiso ku qaadeen naftood halligayaal ka tirsan Al Shabaab ayaa xaaladdiisu hadda deggantahay, kaddib markii ciidamo ka tirsan nabad sugidda oo si gaar ah u tababaran ay galeen gudaha hoteelka iyagoo soo afjaray dhagar qabayaashii galay gudaha hoteelka.
Ciidamada ayaa soo badbaadiyay inta badan dadkii hoteelka ku jiray, kuwaasoo isugu jiray mas’uuliyiin iyo dad rayid ah oo deganaa hoteelka.
Sidoo kale ciidamada ayaa dilaay dhamaan dhagar qabayaashii hoteelka soo weeraray oo ka koobnaa ilaa Shan ruux, waxeyna ciidamadu wadaan baaritaano ay ku xaqiijinayaan amniga hoteelka.
Wasiirka Amniga gudaha mudane C/risaaq Cumar Maxamed, ayaa sheegay in ciidamada ammaanka gaar ahaan kuwa Nabad Sugidda ay ku guuleesteen in ay soo afjaraan howlgakii ay ku galeen dhismaha Hotelka Saxafi. isagoo xusay in la dilay maleeshiyaadkii weerarka geystay,
Dhinaca kale wasiirka ayaa tilmaamay in hadda la wado tirakoobka dadka ku dhintay iyo ku dhaawacmay weerarkaasi argagixiso ee saaka lagu qaaday hoteelka Saxafi ee magaalada Muqdisho.
