Tartan cilmiyeedka bisha Ramadaan oo galay sanadkii todobaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankii labo iyo tobnaad ku tartamay tartameyaasha Degmooyinka Dayniile VS Shibis oo ka wada tirsan Benaadir, waxaana barnaamijka sanadkii afaraad oo xiriir ah taabagelineya Maamulka Gobolka Benaadir.
Tartameyaasha labada degmo ee Dayniile VS Shibis ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon, waxaana sida sharciga qabo marka labada degmo la weydiiyo min afar su’aal la guda galay isbarashada degmooyinka iyo waxyaabaha ay degmo kasta caan ku tahay oo maqal iyo muuqaalba leh.
Dayniile
Tartameyaasha Degmada Deyniile ee gobolka Benaadir waxaa la weydiiyey todobo Su’aal, waxaana ay si sax ah uga jawaabeen labo su’aal, waxaana ay iska qaldeen shan su’aal, mana jirin wax ka faa’iideysi ah oo ay heleen tartamayaasha degmada Dayniile, hadaba wadarta guud ee dhibcaha tartameyaasha Degmada Dayniile ay heleen waxay noqoneysaa afar (4) dhibcood.
Shibis
Tartamayaasha Degmada Shibis ee gobolka Benaadir waxaa dhankooda la weydiiyay todobo su’aal, waxa ay ka jawaabeen Labo su’aal, waxa ay iska qaldeen shan su’aal, waxana ay ka faa’iideysteen Hal su’aal oo soo hareer martay tartamayaasha Degmada Deyniile, waxaana wadarta guud ee dhibcaha heleen tartameyaasha degmada Shibis ay noqotay lix (6) dhibcood.
Tartamayaasha Degmada Shibis ee gobolka Benaadir ayaa caawa u soo gudbay wareegga labaad ee tartanka.
Hadaba Habeen dambe oo ah habeenka saddex iyo tobnaad ee tartan cilmiyeedka Warbaahinta Qaranka hadii uu Alle idmo Barnaamijka, waxaa ku tartami doona tartamayaasha Degmooyinka Howlwadaag Vs C/casiis oo ka wada tirsan Gobolka Benaadir.
Sawir Qaade:- Khadar Cali Nuur
