Wabiga Shabelle ee mara gobollada Hiiraan, Sh/dhexe iyo Sh/hoose ayaa qarka u saaran in uu ku fataho deegaanno hor leh oo ka tirsan gobolladaasi, kaddib markii uu wabigu keenay biyo farabadan isagoo meelaha qaar gebiyada jabsaday.
Beeraleyda iyo dadka ku dhaqan deegaanada u dhow wabigaasi ayaa wel wel iyo cabsi ka qaba in uu wabigu ku soo fataho, waxaana deegaannada qaar ka socdo dadaallo lagu celinayo meelaha uu wabigu ka biyo keeno. iyadoo la dhigay jawaano carro ah oo farabadan.
Magaalooyinka Beledweyn, Mahadaay, Jowhar, Xawaadleey iyo Balcad ayaa ka mid ah meelaha laga cabsi qabo in wabigu ku fataho xilligaan, waxeyna dad badani ka barakaceen deegaano uu dhawaan wabigu ku fatahay.
Fatahaaddan ayaa waxyeello badan gaarsiisay dhul beereed ay ku abuurnaayeen dalagyo kala gedisan sida sisinta,galley,khudaar iyo Bariis.
