Kulankan oo geba-gaba u ahaa shirar maalmahan dambe ka soconayay magaalada Gaalkacyo ee xarunta maamulka Galmudug ayaa waxaa heshiis lagu dhex dhigay laba kamid ah beelaha dega gobolka Mudug si meesha looga saaro mad madow ka dhexjiray sanadihii lasoo dhaafay iyadoo munaasabada heshiiskana ay goobjoog ka ahaayeen waxgarad iyo aqoonyahano ka socday labada dhinac.
Beelahan ayaa ku heshiiyay in laga gudbo wixii horay u dhex maray islamrkaana wixii hadda ka dambeeya si isku mid ah looga soo horjeesto cid kasta oo sababi karta iska horkeen dhiig ku daato dhinacyada dhibaatada ka wada labada dhinac
Wasiirka dib u heshiisiinta iyo arimaha federaalka maamul goboleedka Galmudug oo kulankan ka ahdlay ayaa sheegay in aan loo baahneyn xiligan xasilooni daro ka jirta deegaanada qaar iyo in ay dagaalamaan dad walaalo ah.
C/weli Jaamac warsame Gorod oo kamid ah aqoonyahanadii kasoo shaqeeyay in lasoo afjaro khilaafaadka dhanka beelaha ee ka jira gobolka Mudug ayaa tilmaamay ineysan horumari Karin bulsho aan nabad ku wada noolaan.
Suldaan C/naasir Jaamac Seed ayaa isna dhankiisa ugu baaqay dhamaan beelaha dega deegaanada Galmudug inay u istaagaan sidii ay u taageeri lahaayeen maamulka la doonayo in laga hirgeliyo gobollada Mudug iyo Galguduud ee ay wado dowladda feederaalka Soomaaliya.
