Isbitaalka Dhimarka ee Cosoble oo laga furay xaafadda Cali Geeddi ee degmada Kaaraan ayaa qaabila dadka qaba xanuunsanaya Dhimirka, kuwaasoo isugu jira kuwa maskaxda looga jiro iyo kuwo isticmaalay Daroogada.
Maamulaha Isbitaalkaasi Dr. Aadan Cali Cosoble ayaa sheegay in sanadkii 2013-dii uu isbitaalka ka furay xaafadda Cali Geeddi ee degmada Kaaraan, kadib markii sida uu sheegay ay dadka dhimirka la’ ku soo bateen magaalada Muqdisho.
Dr. Cosoble ayaa xusay in Isbitaalka ay ku jiraan ku dhawaad Boqol qofood oo isugu jira rag iyo Dumar, kuwaasoo qaba xanuunka Dhimirka, wuxuuna intaa raaciyay in bukaannadaasi ay Isbitaalka ka helaan daryeel iyo daweeyn joogta ah.
“Muddadii uu furnaa Isbitaalka waxaan daweeynay boqolaal dad ah oo qabay xanuunka dhimirka, haddana bukaannada ku jira Isbitalka waxa u socda daweyn iyo daryeel joogta ah, waxeyna cisbitaalka ka helaan raashiin jiif iyo xanaano dheeraad ah” ayuu yiri Dr Aadan Cali Cosoble.
Dr. Aadan ayaa tilmaamay in muddadii la furay Isbitalka ilaa hadda aysan jirin cid soo caawisay, isagoo ka dalbaday hey’adaha gargaarka iyo dadka Soomaaliyeed ee muxsiniinta ah ineey kaalmo la soo gaaraan Isbitaalka.
