Maxkamada darajada Koowaad ee ciidamada qalabka sida ee dowlada Soomaaliya ayaa maanta xukunno ku riday eedeysanayaal maxkamada horey loo horkeenay, kuwaas oo lala xiriiriyey weeraradii bishii lasoo dhaafay ka dhacay magaalada Baydhabo ee xarunta gobolka Baay.
Eedeysanayaasha la xukumay oo gaarayey ilaa iyo todobo ruux ayaa maxkamadu waxaa shan kamid ah ay ku xukuntay dil toogasho ah, kadib markii ay ku cadaadeen dambiyadii loo heystay oo ahaa in ay ku lug lahaayeen weeraradii ka dhacay bishii hore magaalada Baydhabo, halkaas oo dad shacab ah dhibaato ay kasoo gaartay.
Related posts
Labada ruux ee kale ayey maxkamadu midkood fasaxday, halka ruuxa kalena lagu xukumay sadex sano oo xabsi ah, sida uu ku dhawaaqay gudoomiyaha maxkamada darajada koowad ee ciidamada qalabka sida Gaashaanle dhexe Xasan Cali Nuur Shuute.
Gudoomiye Xasan Cali Nuur Shuute oo ay wehliyaan xubno kale oo katirsan maxkamada ayaa u sheegay wakaalada wararka qaranka Soomaaliyeed ee SONNA, in Baydhabo ay u joogaan sidii sharciga ay u marsiin lahaayeen dambiilayaasha lala xiriiriyey dhibaateynta shacabka.
Dadka hada la xukumay ayaa lagu eedeeyey in ay qeyb ka ahaayeen abaabulka weeraradii shacabka lagu laayey ee ka dhacay magaalada Baydhabo ee xarunta gobolka Baay, sidaas waxa aanu ka soo xiganay Wakaaladda Wararka Soomaaliyeed ee SONNA
