Danjiraha dowladda Soomaaliya u fadhiya wadanka Kenya ayaa ugu baaqay ganacsatada Soomaaliyeed in ay si nabad ah ugu ganacsadaan xaafadda Islii ee magaalada Nairobi, lana dhowro sharciyada wadanka Kenya.
Kaddib shir jaraa’iid oo uu ku qabtay magaalada Nairobi ee xarrunta wadanka Kenya safiirka Soomaaliya u fadhiya wadanka Kenya, mudane Jamaal Maxamed Xasan ayuu kaga hadlay xirnaashiyaha ganacsi ee maalmihii dambe ka jira xaafadda Soomaalidu ay degto ee Islii.
Danjire Jamaal ayaa dadka Soomaaliyeed iyo dhammaan kuwa ganacsatada ah ku booriyay in ay amniga xaafadda Islii ka shaqeeyaan, ayna u hoggaansamaan shuruucda dowladda Kenya.
“Runtii waxaan rabaa waxyar in aan ka hadlo sida aad maqasheen suuqa Islii maalmahaanba waa xirnaa, oo arrimo yar oo ganacsatada dhaxdooda oo kuwa waratada iyo kuwa dukaamadda leh, waxaan rabaa in aan u mahad naqo dowladda Kenya sida ay arrintaan u soo dhax gashay, wax uga qabatay, runtii aad iyo aad bay u mahadsanyihiin” ayuu yiri Danjire Jamaal.
Danjire Jamaal ayaa rajo wanaagsan ka muuujiyay in la xalliyo khilaafka u dhaxeeya ganacsatada waratada ah iyo kuwa waaweyn, wuxuuna ballan qaaday in safaaradda Soomaaliya ee dalka Kenya ay caawin doonto cidka kasta oo Soomaaliyeed oo wax uga baahata safaaradda.
Afartii maalin ee u dambeysay ayaa jahwareer ganacsi waxa uu ka jiray xaafadda Islii ee magaalada Nairobi, taasi oo sababtay in ciidamo badan lagu soo daadiyay xaafadda, si ay ammaanka u xaqiijiyaan.
