Danjiraha Jamhuuriyadda Federaalka Soomaaliya ee dalka Kenya, Mudane Jabriil Ibraahim Cabdulle, ayaa xarunta Safaaradda Soomaaliya ee Nairobi ku qaabilay Ruth Anne Stevens Klitz, oo ah Ku-xigeenka iyo Ku-simaha Danjiraha Safaaradda Mareykanka ee Soomaaliya.
Intii uu kulanku socday, labada dhinac ayaa ka wada hadlay xiriirka iyo iskaashiga ka dhexeeya Soomaaliya iyo Mareykanka, iyo arrimo kale oo muhiim u ah labada dal.
Sidoo kale, waxaa si gaar ah looga hadlay doorka muhiimka ah ee Mareykanku ka qaato taageerada amniga Soomaaliya iyo dadaallada lagula dagaallamayo kooxaha argagixisada ah, gaar ahaan Al-Shabaab.
Kulanka waxaa sidoo kale goob-joog ka ahaa Lataliyaha Koowaad ee Safaaradda Soomaaliya ee Kenya, Mudane Cali Khadar.
Labada dhinac ayaa sidoo kale isla soo qaaday danaha guud ee labada dal iyo sidii loo sii xoojin lahaa wada-shaqeynta iyo xiriirka diblomaasiyadeed ee Soomaaliya iyo Mareykanka.
