Xaflad lagu abaal marinayay ganacsatada Soomaalida ee bariga Afrika, shaqsiyaad iyo shirkado oo la xiriirta abalmarinta bariga Afrika ee sanadkii tegay 2024ka (East Afrika Somali Awards) ayaa xalay lagu qabtay magaalada Nairobi ee dalka.
Danjire Jabriil Ibraahim Cabdulle Danjiraha Dowladda Soomaaliya ee dalka Kenya, Wasiiro ka tirsan Xukuumadda Federaalka Soomaaliya, Xildhibaanno ka tirsan Baarlamaanka Kenya iyo xubno kale oo madasha lagu casuumay ayaa ka qeybgalay.
Danjiraha oo daahfuray madashan ayaa xusay inay tahay markii ugu horeysay oo la qabto xaflad nuucaani oo kale ah oo lagu abaal marinayo bulshada bariga Afrika, isagoo bogaadiyay dadkii isku howlay diyaarinta munaasabaddan taariikhiga ah ee ah East Afrika Somali Awards.
“Waxaan bogaadinayaa Ridwaan iyo team kiisa shaqada quruxda badan ee ay qabteen oo ah in qofkasta lagu abaal mariyo waxa uu muteystay, anigoo ku hadlaya Afka Dowladda Soomaaliya waxaan Hambalyo u dirayaa dhamaan inta ku guuleysatay abaalmarintan”.ayuu yiri Danjire Jabril.
Danjiraha ayaa hoosta ka xariiqay in bulshada Soomaaliyeed ay yihiin dad hal abuur leh, oo markasta bariga Afrika iyo caalamkaba ku soo kordhiyo fursado ganacsi iyo maalgashi intuba, ayna tahay waxa ugu horeeya ee Wakiilada caalamku kala hadlaan Danjire Jabriil.
