Danjire Jabriil Ibraahim Cabdulle ayaa sanadkii 2aad oo xiriir ah magaalada Mombasa uga qeybgalay Tartanka Xifdinta Qur’aanka Kariimka ah oo ay ka qeybgaleen arday ka kala socotay dalalka bariga Afrika oo ay Soomaaliya qeyb ka tahay.
“Waxaan si weyn ugu mahadcelinayaa hoggaanka Ismaamulka Mombasa, oo uu ugu horeeyo walaalkey, Guddoomiyaha Gobolka Abdullswamad Sherrif Nassir dadaalka hagar la’aanta ah oo ay ku bixiyeen taaba gelinta iyo sare u qaadida tartankan caalamiga oo Ardayda ay ku soo bandhigayeen sida ay u xifdisanyihiin Qur’aanka Kariimka”.ayuu yiri Danjire Jabril.
Danjiraha Dowladda Soomaaliya ee dalka Kenya ayaa xusay in marka la dhageysanayo dhallinyarada xaafidul Qur’aanka ah sida ay Qiraa’ada u akhrinayaan uu qofkasta qushuuc dareemayo, isla markaana uu helayo awood uu ku maareeyo caqabadaha xaga nolosha ee maalin kasta la soo darsa.
“ASW waxaan ka baryayaa inuu barakeeyo dhamaan intii sida hagar la’aanta ah uga soo shaqeysay inay tani noqoto dhacdo dhab ah oo caalami ah oo lagu weyneynayo qawlka Alle”. Ayuu Danjiraha hadalkiisa ku soo gabagabeeyay.
