Danjiraha Jamhuuriyadda Federaalka Soomaaliya ee Kenya, Mudane Danjire Jabriil Ibrahim Cabdulle, ayaa maanta Xarunta Safaaradda Soomaaliya ee Nairobi, ku qaabilay Wakiilka Hay’adda Caafimaadka Adduunka (WHO) ee Soomaaliya, Dr. Humphrey Karamagi, oo booqasho shaqo ku yimid xarunta safaradda.
Kulanka ayaa diiradda lagu saaray xoojinta iskaashiga iyo wada-shaqaynta, is-kaashiga iyo taageerada dadaallada lagu horumarinayo caafimaadka Soomaaliya iyo wax ka qabashada caqabadaha caafimaad ee dalka.
Danjire Jabriil ibraahim Cabdulle iyo Wakiilka WHO ayaa sidoo kale ka wada hadlay sidii loo sii xoojin lahaa isku-xirka hay’adaha iyo wada-shaqaynta dhinacyada kala duwan, si loo helo taageero wax-ku-ool ah oo gacan ka geysata dadaallada Dowladda Soomaaliya ee lagu horumarinayo adeegyada caafimaadka, kor loogu qaadayo tayada nidaamka caafimaadka, loona xaqiijinayo in bulshada Soomaaliyeed ay hesho adeegyo caafimaad oo tayo leh oo waara.
Waxaa sidoo kale kulanka lagu soo hadal qaaday sare u qaadida xirfadaha iyo aqoonta howlwadeenada caafimaadka dalka Soomaaliya.
