Allaha u naxariistee, Diinle Qase Raage oo ku magac dheeraa Diinle Kabiirow wuxuu ahaa Aabe, nolosha qoyskiisa ku masaruufa Gaari gacan uu ku xamaali jiray.
Laakiin, noloshiisa ayaa ku dhamaatay meel u dhow Tiyaatarka Qaranka 22-kii bishaan December, ka dib markii Al-Shabaab halkaasi ay ku qarxiyeen Gaari ay ka soo rakibeen waxyaabaha Qarxa.
Gaari gacan ayuu ku riixayay Loor dhuxul ah, oo uu ku sii jeeday guri ku yaala degmada Warta Nabadda, xilliga ay musiibada ku qabsatay Agagaarka Golaha Murtida, sida ay inoo xaqiijisay Kaltuumo Maxamed Mataan oo ah afadiisa.
Diinle Kabiirow, wuxuu ahaa 82-sano jir, ku shaqaysta xoogiisa, wixii dhididkiisa uu ku helana ku koriya carruurtiisa, ku dhowaad 30-sano ayuu ku shaqeynayay Gaari gacanka, sida ay inoo sheegeen dadkii yaqaanay Diinle.
Wuxuu ifka oga tagay Diinle 41- ruux oo isugu jira wuxuu dhalay iyo wixii ay sii dhaleen iyo xaaskiisa, sidoo kale inta uusan geeriyoon wuxuu gacanta ku haayay oo uu korinayay 21-Carruur ah.
Wuxuu ahaa nin naxariis badan, oo leh dabeecad wanaagsan, Af gaaban, sidoo kalana dadka caawin jiray oo ay aad u jeclaayeen dadka dariska ah iyo asxaabtiisa, sida ay inoo sheegeen dadkii yaqaanay Diinle.
Hooyo, Kaltuumo Maxamed Mataan, oo ah xaaskii uu ka geeriyooday Aabe, Diinle Qase Raage, ayaa sheegtay inaysan jirin il kale oo ay ku tiirsanaayeen marka laga reebo Marxuumka geeriyooday, waxaana iminka ay sugayaan caawinta Alle iyo sidoo kale Shacabka Soomaaliyeed.
Ciddii awoodo in ay caawiso qoyskan waxaa ay kala xiriiri karaan; 0617610672.
