Munaasabadaan lagu daah furayay xarunta Hooyada iyo dhalaanka Deegaanka Jaziira ee duleedka Muqdisho ayaa waxaa ka qeyb galay mas’uuliyiin ka socday maamul goboleedka Koonfurgalbeed ee Soomaaliya, Xubnoa ka socday Hay’adda Qatar Charity iyo dadka deegaanka.
Deegaan xeebeedka Jaziira ee duleedka Muqdisho ayaa xaruntan caafiamad ee maanta laga hirgeliyay ay noqoneysaa tii ugu horeysay ee halkaasi laga furo, waxaana goobta ka hadlay Guddoomiyaha deegaanka Jaziira Cabdicasiis Xaaji Cali, kaasi oo tilmaamay in bulshada deegaanka ay baahi weyn u qabeen helidda adeegyo caafimaad, isla markaana ay xaruntan caafimaad ka saacidi doonto dadka ay u soo qaadi jireen Muqdisho.
Madaxa bariga Afrika ee Hay’adda Qatar charity Maxamed Xuseen Cumar ayaa sheegay inay aad ugu faraxsanyihiin inay soo gabo gabeeyeen dhismaha xarunta hooyada iyo dhalaanka ee deegaanka Jaziira, isagoo xusay in ay yihiin hay’addii ugu horeysay ee xarun caafimaad ka hirgelisa Deegaanka Jzaiira, iyagoo ka jawaabaya baahida ay bulshada u qabeen helidda adeegyo caafimaad.
Wasiirka Caafimaadka ee Koonfurgalbeed Soomaaliya Mudane Isxaaq Cali Sood ayaa sheegay in xarunta ay noqon doonto mid loogu adeegayo bulshada, isagoo shacabka ka dalbaday inay ilaashadaan xarunta.
Xaruntan cusub ee Hooyada iyo dhalaanka ee maanta laga hirgeliyay deegaanka Jaziira ee duleedka Muqdisho ayaa waxaa ka faa’iideysan doono bulshada deegaankaasi ku nool, maadaama deegaanka uu ka midyahay goobaha loo dalxiis tego.
