Ciidamada maamulka Jubbaland iyo kuwa Nabad Ilaalinta Midowga Afrika ee AMISSOM ayaa maanta weerar ku qaaday deegaanka Yoontooy iyo tuulooyin kale oo ka tirsan Gobolka Jubbada Hoose kaddib markii duqeymo qasaare geystay lagu bartilmaameedsaday fariisimo ay ku dhuumaaleysanayeen kooxda Shabaab.
Saraakiisha ciidanka Jubbaland ayaa sheegay in duqeymo dhanka cirka ah oo maalmihii lasoo dhaafay ka dhacay deeganno ka tirsan Jubbada hoose, kuwaasi oo lagu dilay 27 ka tirsan Kooxda Alshabaab oo isugu jiray horjoogayaal iyo maleeshiyaad ka tirsan kooxdaasi.
Taliyaha howlgalladda ciidanka Jubbaland Korneyl Maxamed Sheekh Cabdi ayaa tilmaamay in ciidanka nabad ilaalinta Midowga Afrika ee AMSOM ay duqeymo ka geysteen deegaannada Buula-gaduud, Yoontooy, Qaanqaan, Jamaame iyo degmada Jilib ee gobolka Jubbada Hoose, isagoo intaa ku daray in duqeymahaasi ay bar bar socdeen howlgallo dib gacanta dowladda loogu soo celinayo deegannada ay ku suganyihiin kooxda Shabaab.
“Duqeymaha iyo howlgalladii ugu dambeeyay ee aan sida wada jirka ah ugu qaadnay deegannada ay ku dhuumaaleysanayaan argagixisada Al-Shabaab waxaan ku bur burinay gaadiid iyo fariisimo ay kooxdaasi ku lahayd deegaannada ku dhaw webiga Jubba” ayuu yiri Korneyl Maxamed Sheekh.
