Ciidanka booliiska ayaa maanta dekada Muqdisho ku qabtay kontainer Khamri ah kaas saxaafadda loo soo bandhigay, iyadoo goobta lagu soo bandhigay ay joogeen mas’uuliyiin ka tirsan maamulka gobolka Banaadir iyo saraakiil ka tirsan booliiska Soomaaliya.
Mas’uuliyiinta ayaa sheegay in kontainerka ay ku jiraan 905 kartoon oo Khamri ah kuwaas isla maanta lagu gubay duleedka magaalada Muqdisho.
Guddoomiye ku xigeenka arrimaha bulshada maamulka gobolka Banaadir, Basma Caamir Shakeeti ayaa sheegtay in sidoo kale, in Khamri kale lagu qabtay garoonka diyaaradaha magaalada Muqdisho, kuwaas oo boorsooyin lagu dhex qariyay.
Taliye ku xigeenka hogaanka dambi baarista ee ciidanka booliiska Soomaaliya Janaraal Bishaar Cabdi Geedi iyo taliyaha hogaanka Canshuuraha ciidanka booliiska Janaraal C/laahi Xasan Bariise ayaa kamid ahaa mas’uuliyiinta goob jooga ka ahaa gubista iyo burburinta Khamrigan.
