Dhalinyaradan burcad badeedda ah oo tiradoodu gaarayso 33, isla markaana ku jira xabsi ku yaala magaalada Muscat ee dalka Cuman ayaa codsaday in dalkooga dib loogu maxkamadeeyo oo laga saaro xabsiga ku yaalla dalka Cuman.
Cabdi-nuur Cabdullaahi oo la hadlay Radio Muqdisho isaga oo ku jira xabsiga magaalada Muscat ayaa sheegay in laga qabto biyaha Soomaaliya xilli ay ku guda jireen howlo burcad badeednimo ah, waxaana uu intaa ku daray in Saldannadda Cuman ay kolhore soo saareen wareegto lagu ogolaanayo maxaabiista ka soo jeedda dalalka Jaamacadda Carabta ay wadan karaan.
“Waxaan gaareynaa 33 dhalinyaro ah oo da’dooda ay u dhexeyso 25-30 jir, howlo burcad badeednimo ayaa nalagu qabtay, runtii arrintan dhibaato ayaa noo geysay, tankale xabsiga dhibaatooyinka aan ku qabno waxaa ka mid ah jirdil iyo caafimaad darro, waxaan nalagu xakumay xabsi daa’in, marka waxaan Madaxda sare ee dowladda Federaalka ah ka codsaneynaa inay dib noogu celiyaan dalkeena, oo halkaasi nalagu maxkamadeeyo”.ayuu yiri Cabdi-nuur.
Cabdi-nuur Cabdullaahi ayaa sidoo kale tilmaamay in ay yihiin dhalinyaro qaldantay oo hadda diyaar u ah in ay ka waantoobaan kiiska lagu haysto, waxaana uu xusay inaysan markale dib ugu noqon doonin falalka burcad badeednimada oo uu ku sheegay inay ku sababtay daruufo adag oo xilligaasi dalka ka jirtay.
