Dhallinyaradaan ayaa isugu yimid inay ka dhiidhiyaan dagaallo ka soo cusboonaaday Gobolka Shabeellaha Dhexe gaar ahaan Degmada Warshiiq iyo deegaanno hoostaga waxaana ay ugu baaqeen dadka walaalaha ah ee dagaallamaya inay si sharuud la’aan ah ku joojiyaan dagaalka micna darradaha iyadoo sidoo kale lagu jiro bishii cibaadada ee Ramadaanka.
Kulanka ay ku yeesheen magaalada Muqdisho waxaa kala qeyb-galay Guddoomiyaha Ururka dhallinyarada Gobolka Banaadir Cabdikaafi Maxamuud Makaraan isagoo bogaadiyay in dhallinyarada ay u hormuud u noqdaan nabadeynta iyo hormarinta dalka maadaama ay yihiin mustaqbalka dalkaan uu heysto
Dhallinyarada soo qaban qaabiyay oo dhammaan ay ahaayeen aqoonyahanno ayaa sheegay in xilligaan loo baahanyahay in laga shaqeeyo hormarka deegaanka iyagoo tacsi u hiray dadkii ku dhintay iyo inta waxyeelo ay ka soo gaartay.
“Waxaan ka dhiishineynaa sida aan uga xunahay dagaalka kasoo cusboonaaday degmada Warshiiq iyo deegaano kale kuwaasi oo ah dagaallo jahli ah maxaa yeelay xilli dagaal laguma jiro, waxaana ka doorbineynaa sidii aan uga shaqeyn laheyn danaha iyo hormarka deegaanka iyo sidoo kale la jaan qaadida Magaalooyinka kale ee dalka”sidaas ayay yiraahdeen qaar ka mid dhalinyada aqoonyahanada ee kasoo horjeestay dagaalka.
Eng.Cabaas Cabdiraxmaan Xuseen oo ka mid agaasinka madasha oo la hadlay warbaahinta kulanka kaddib ayaa u akhriyay qoddobadii shirka kasoo baxay oo dhallinuyaradu isla garteen.
“Ugu horeyn Waxaan ka tacsiyadeyneynaa dadkii ku dhintay iyo sidoo kale dadka waxyeeladu kasoo gaartay waxaana leenahay dagaal wiil kuma dhashee wiilbaa ku dhintay sidaa daraadeed waxaan leenahay labada dhinac ee walaalaha ha isdilina, joojiya dagaal aan micno ku fadhinin”Sidaas waxaa yiri Cabaas Cabdiraxmaan Xuseen oo warsaxaafadeedka u akhriyay.
